今時今日如果大家要出遠門，除咗搭的士之外，仲有飛機、高鐵、郵輪等等嘅選擇，真係千變萬化。之不過，喺古代古人如果要出遠門，其實馬匹就真係最主流嘅選擇，但如果古人冇錢養馬又或者租馬，咁仲可以有咩「交通工具」呢？阿史今次就同大家講一講啦！
要知道古代嘅「交通工具」並唔多，有錢嘅古人都會自己養馬，通過馬匹就可以有馬車出門，又或者僱用下人抬轎，但冇乜錢嘅古人又可以點做呢？其實古代都有得租馬出行嘅，特別係宋代之時京城嘅租馬代步業務就已經發展得相當發達，旅途仲可以按照單程或者來回計算，但價錢就唔係人人負擔得嚟。
咁除咗租馬，古人其實仲可以六個人咁樣一齊「拼車」，拼嘅正正就係「牛車」，據《東京夢華錄》記載，呢種牛車就係「如檐子樣制，亦可容六人，前後有小勾欄，底下軸貫兩挾朱輪，前出長轅約七八尺，獨牛駕之，亦可假賃」，雖然速度比較慢，但價錢就可以平好多。
同樣地，租驢服務喺宋朝都一樣有，由於價錢比租馬平得多，所以原本市場唔算大嘅租驢服務，亦都喺宋神宗熙寧年間開始盛行，真係估佢唔到！
原圖嚟自網絡